تضحك وتبكي

اشتد الحال وين غابن الحور	وصاب القلب جور
		وزاد الجرح غير طبعي صبور

اشتد الحال واسكـر اكتابي	وجافـو أصحابي
		ووين ناديت ما اهتمو بجوابي
طلبت الله غير يمطر سحابي	انبـدل الشــور
		انشيل الشوك ونغرس ازهور

اشتد الحال وخلانـي الرفيق	في شـده وضيق
		تاري خيط محبتنا رقيــق
فـ وسط الوهم شقينا طريق	وعبرنا ابحـور
		وفوق الوهم شيدنا اقصـور

اشتد الحال والعيشه صعيبـه	وزاد قلبي وجيبه
		دايب دوب من فـرقـة حبيبـه
وكني غفيــت نومي يجيبه	الفايح بالعطـور
		يحيي النفس وهو ماهو حضور

اشتد الحال والحاله عسيـره	وزاد العقل الحيره
		ايجيب الفكر في طيف الصغيره
تحرك ايديها كيف الطويـره	وتضـوي بنـور
		يصير العش في عيني اقصـور

اشتد الحال ومتكاثر الهــمّ	وفارقـت لُـمّ
		وما لاقيــت من بيـا اهتـمّ
اطريلي كيف من شارب السمّ	ادماغه ايفـور
		لاشيـخ نفعه لا نفع دكتــور

اشتد الحال في غياب الغوالي	وباقي شين حالي
		وزاد البرد فوق برد الليالــي
يامـولاي ياعالــم بحالـي	تجيب الشمس نور
		وبعد الليل تضــاوى افجـور