غير اوعديني

غير اوعديني.. واخلفي الميعاد
انك اتجيني
في غيبة الحساد

غير اوعديني
ومايهم اخلاف
انا عارفك
ماتخالفي بالراده
عليْ خايفه
وانا عليك انخاف
واللي عشق
ايخاف من حساده
مني الوفا بالوعد
ومنك غلا في البعد
وهذا - في غلانا - ساد
غير اوعديني.. واخلفي الميعاد
 

غير اوعدي
وانا على مرجاك
في نفس المكان
تلقيني
وان تبعدي
مصمم على ملقاك
ولو عدا ربيع اسنيني
غير اوعدني... واخلفي
انتي – اطباعي- تعرفي
دوم في الغلا وداد

غير اوعديني.. واخلفي الميعاد