عشاق الجميل

حتى كان عشاق الجميل
رزين الطبع في وقت العشق
لغير الزين ما الخاطر ايميل
لغير السمح ما قلبي خفق

كما صياد في ظلمة الليل
قايس زين واسهامه رشق
وصيدي دوم في ريم الهميل
إن قابل فيه من الغالي نشق
يشوش العقل وين نسمع هذيل
كما المجذوب لا شمّ الوشق
ايرف القلب لا قابل مثيل
لسمح اللون مكحول الرمق

وانرد العقل ما يبقى ضليل
ونكمي جرح من عني فرق
أنا ركاب شرادة الخيل
وقت الغير ما فيها يطق
شديد العزم ما دمعي ايسيل
ومهما صار عزمي ما يرق
عزيز النفس ماني اللي ذليل
ارباية عز ومعيشة روق
لا شكّاي لاني اللي عليل
خفيف الروح وناس الرفق
أنا الشيّال للحمل الثقيل
انعاف الروح لو صار الشرق

بابي خير واجناني ظليل
وباب الخير ما يوم انغلق
في طبعي الجود ماني اللي بخيل
انكنهو صار عالبيبان دق
نجود بالمال ولو عندي قليل
وحلو المال مجيوب بعرق
وينمو العشب في جرة السيل
وياتي الغيث من بعد البرق
ولا شكّار لا غاب الدليل
امغير احساس من الخاطر دفق
يا مولاي يا ربي الجميل
انكون على الحق في ساعة الحق