يا مسافر

يامسافر بعيد إمعاه قل إصغاره
كيف ماشيت عالخير بيه اتجينا
واللي كبير الخوت ليه إقداره
وبالقدر ندعولك طريقك زينا

تركت العجوز بدمعها قطارة
ودمع الحنونة ما يهون علينا
لبكاها الجبل يبكي اتدوب احجاره
ووقتا جبذنا الصبر قالت وينا
ويبرم الشايب حايرات افكاره
ودمعة الشايب حارة تكوينا
واعيالاً بكوا في ركبة السيارة
بعد ماحضنّاهم وحضنوا فينا

وابنيّات ما عرفن الهمّ وكاره
قالن ضنا عمي حبايب لينا
هم خوتنا والدمع موش إخسارة
في خو من ضيم العداء يحمينا
خليتهن يبكن عليك مراره
بدموع جرّت والعيون حزينا
بجاه من خلق الدمع دار مساره
بالخوت ترزقهن يكونوا عينا
وترزق رفيق البو في مشواره
بعيال يبقوله سندّ وزينا
وبجاه من رزق الحوت وسط ابحاره
اجعلنا طرابا وعونا مواتينا

وبجاه من خلق الكون حط اسراره
تزهي بعيد وبالزهاء تاتينا
وياخوى صيور الغريب لداره
ويجمع الله الشمل واتلاقينا