كم من كلام
ينقال
ومن كلمات
قـولتهـا صعيبـه
وكم من حال
يُغنـي ع السـؤال
ومن حاجات
في الدنيا غريبه
ابتسم ياشيخ
افقيّر قليل المال
لا قري لا تعلّم
متلخبط عليه الحال
رافع ايديه امسلّم
وفي خاطره
ستين سؤال
من ايجاوبه
من بيه
من يعلمه
من يورّيه
قالوله انشد الشيخ
عنده اتلاقي
راحة البال الشاقي
وعنده عللْ
لكل من سأل
وللشيخ عدّا
شايل اقدارا وودّا
وين ماوصل
وعنده دخل
سلّم
جلس
وماتكلّم
حبس النفسْ
وغابت الراحه عليه
ما عاد بيها حسْ
لمّا الشيخ في وجهه عبسْ
حسْ وتألّم
تالي تكلّم
اتقول مُعلّم
قال:
إبتسم ياشيخ
راهي البسمه طيبه
إبتسم ياشيخ
اتطمّن القلب اتشيل منه الرّيبه
كل حد فينا تاجر
وين يبتسم للغير
يعطيه مافي جيبه
من قالك
الراجل ايكون واعر
من قالك
الراجل ايخبّي المشاعر
اللي بسمته مرتسمه
م القدر واخد نصيبه
واللي بسمتك من قسمه
لازم اتصير حبيبه
والشيخ عنده عللْ
لكل من سألْ
ديمه السانه حاضر
وكلمته ديمه قريبه
جاوب عليه وقال
وين ما اتحل البسمه
لازم اتغيب الهيبه
حاجه غريبه !
كم من كلام
انقال
وباقي كلام
الفكر مابا ايجيبه
وكم من اشاره
بينت لحوال
ومن حال
ما تنفع امعاه كتيبه