كم من كلام
ينقال
ومن كلمات
قـولتهـا صعيبـه
وكم من حال
يُغنـي ع السـؤال
ومن حاجات
في الدنيا غريبه
مايعجبه شـي
مايعجبه شي لايروقله حال
ديمه امفنّص البي
وكل يوم عنده اشكال
في الصبح يعمل عمايل
وبهدله في القوايل
صبح ع السوريه ليش مش مكويه
وصبح ع السروال
ولعنات تأتي قويه
لو عطل غداه وما وصل في الحال
وعلى قهوته والميه
بعد رقدته في العشيه
وهي راقدة ريح
تسمع وماترد
تبقى قريب اتطيح
ومايحس بيها حدْ
في الحوش صايل وجايل
عنتر إلا شوي
وتبقى عليه إتّحايل
لين تعرف السبع ارضي
في الحوش شر الناس
لاذوق لا إحساس
وكنهو طلع للناس
يغيّر على نغمة الطيبه
الصوت هادي والودْ بادي
لا يغلط ولاتبان منّه عيبه
في الحوش امخاصم امعادي
والحس صادي
وبرّا الحوش
كل حد خوه وحبيبه
حاجه غريبه !
كم من كلام
انقال
وباقي كلام
الفكر مابا ايجيبه
وكم من اشاره
بينت لحوال
ومن حال
ما تنفع امعاه كتيبه