كم من كلام
ينقال
ومن كلمات
قـولتهـا صعيبـه
وكم من حال
يُغنـي ع السـؤال
ومن حاجات
في الدنيا غريبه
لله يامحسنين
كل شي متوفر
وابلادنا كل خير فيها
كل شي متوفر وكل خير ربنا عاطيها
حاجات منها حاجه وحاجات منها إثنين
كل خير متوفر
حتى من الشحاتين فـ إبلادنا نوعين
النوع الأول ايقول
لله يا محسنين حِنّّو على المسكين
حسنه صغيره تدفع بلاوي كثيره
اللي تدفعوه اليوم تلقوه يوم الدين
كل ما يهون عليكم اللي تجود بيه إيديكم
سوى ميه سوى ميتين
سوي ألف والا الفين
وإن كان زدتو شويه
ندعولكم شاكرين
لله يا محسنين
والنوع لاخر ايقول
لله يا محسنين
لله يا مسئولين
ورقه صغيره تمنح مناصب كبيره
لله يا مسئولين
غير اسندوني اليوم
وبكره انرد الدين
عدا عليا زمان
مرمي بعيد ومنسي
والمنسي ماهو بخير
دبرولي ف مكان
حصلولي كرسي
واللي تبوه ايصير
من كيفي وترك كرسيه
من يحسبه
ومن يعزمه وايجيه
من كيفي بلا كرسيه
من يقربه ومنهو ايسلّم عليه
لله يامحسنين حِنّو على المسكين
لله يا مسئولين
مسئول سابق إينين
كل شي متوفر
وابلادنا كل خير فيها
كل شي متوفر
وكل خير ربنا عاطيها
واللي ف البلاد إتنفّر
حاجات يصعب علي نحصيها
واللي مـ البلاد إتسفّر
حتي المناصب
تنشحت شحته وطليبه
حاجه غريبه !
كم من كلام
انقال
وباقي كلام
الفكر مابا ايجيبه
وكم من اشاره
بينت لحوال
ومن حال
ما تنفع امعاه كتيبه