كم من كلام
ينقال
ومن كلمات
قـولتهـا صعيبـه
وكم من حال
يُغنـي ع السـؤال
ومن حاجات
في الدنيا غريبه
كان ياما كان
كان ياما كان
كان شاب من الشبان
يهوى قريبه ليه
وفي اعيونها ولهان
ع الحب السخي.. عايشين
بالود النقي.. راضين
ومرّتْ عليها اسنين
ترجى النصيب ايبان...!
وجاها نصيب .. عنها غريب
وهلها - وهم عارفين-
ما قصّرو .. بعثوله
وبمعنى الكلام قالوله
انت اللي.. منها قريب
وانت اللي.. ليها حبيب
ان كان مانك امقدم
خلي الغريب يبقى قريب
ضاقت عليه الوسيعه
ومالقاش والي يضمّه
المسكين حس الوجيعه
وم الدمع .. لين بلْ كمه
وقال: آآآه
في تنهيده
إن جت عالجبل اتكيده
بالله كيف الحيله
وانا ابروحي والطريق طويله
بالله كيف الحيله
وانا كبير خوتي وخوتي عويله
وخداها النصيب منّه
وهُوّا ينظر
ويقول بكره
عالحبايب نصبر
وفي يوم زفتها
كان لازم احداها
يكون حد من عيلتها
هو السند والعون
ايجيها ويمسك يدّها
وليدْ النصيب ايمدّها
وكان هو اللي اختاروه
ومن دونهم نادوه
رفعت نظرها فيه
سالت دمعه
وذابت اشموع الامل
شمعه.. شمعه
ترك يدّها
وخلاها
وما مسح دمعتها
وما كان يعرف انّ :
اللي تتركه تقدر تعيش بلاه
إلا الحبيب إن ضاع كيف اتجيبه
واتدور حبيب كيفه وما تلقاه
والعمر يكمل بين خيبه وخيبه
واليوم .. بعد اسنين
عايش مع صورتها
وذكرى عبير أنفاسها وهمستها
وديمه على السانه
الغلا وسريبه
وقبل المنام
ايجيب طيف حبيبه
ويقول يارب
المنام ايجيبه
حاجه غريبه !
كم من كلام
انقال
وباقي كلام
الفكر مابا ايجيبه
وكم من اشاره
بينت لحوال
ومن حال
ما تنفع امعاه كتيبه