كم من كلام
ينقال
ومن كلمات
قـولتهـا صعيبـه
وكم من حال
يُغنـي ع السـؤال
ومن حاجات
في الدنيا غريبه
طفلـــــة
طفلة تقرا
سمحة شقرا .. اتقول غزاله
لا تعرف في الدنيا حيره .. لا تكديـره
اتقول اتعيش فـ احسن حاله
وفي يوم من ليام في استراحه
فيه شي صاب احساسها
غابت عليها الراحه
وين ما انقطع امداسها
قالت لبوها دامعه
بعد ما تكدر حالها
والأم كانت سامعه
والحال شاغل بالها
امداسي انقطع يا بوي
هللي زمــان شريته
كعبه نصل يابوي
في المدرسه وما القيته
واطى الراجل راسه
المسكين جاته ثقيله
حست البنت احساسه
وعازته وقلة الحيله
قالت : نا عارفة يابوي
إنّ ظروفك صعبه
تبيع لعبتي يابوي
لو كان عندي لعبه
بكرة نكبر .. بكرة نقرا
بكرة تبقى العازه ذكرى
لكن زعمه
كيف بنقرا
وكيف نفهم درسي وعنوانه
وكيف نمشي لمدرستي ونقرا
انخاف ايقولولي حفيانه
وفي المدرسه قالولنا
اللي ما تجي في امداس .. ما نقرّوها
اللي ما تجي في امداس .. ما نبّوها
وقالوا ابنادم قيمته في امداسه
يامن امداسه جديد
يامن تعلى راسه
وقالولنــا الحفيان كيف ايتعلم
العلـم يبي امـداس
الحفيان كيف يتكلم
الحفيان مش مالناس
وبلا امداس قالو
ما تصير كتيبـه
وقالولنا يابـوي
ابنادم حبيبه جيبه
حاجه غريبه !
كم من كلام
انقال
وباقي كلام
الفكر مابا ايجيبه
وكم من اشاره
بينت لحوال
ومن حال
ما تنفع امعاه كتيبه