كم من كلام

 ينقال

 ومن كلمات

 قـولتهـا صعيبـه

وكم من حال

يُغنـي ع السـؤال

ومن حاجات

في الدنيا غريبه

من يوم ماهب الهوى

من يوم ما هب الهوى

كل ما يتلاقو ..

تبتسم

وتبدا في خياله للغلا

صورة جميله

ترتسم

ومرت أيام طوال

والحال هو الحال

كل ما يتلاقو تبتسم

وفي يوم من ليّام نادتها رفيقتها

ومنها عرف الاسم

وفي يوم من ليّام صمّم تبع جرتها

عرف بيتها وعيلتها

وخداه السهر ماينام

لا وخر ولا قّدم

ولاهو بنى لا هدّم

ومرت أيام طوال

تبدل عليه الحال

اتسلّم عليه بنظره

فيها ملامه وحسره

وهوّا تبلد فكره

لايفهم ولايفهّم

ووين غابت عليه احتار

ولمّا نشد.. قالوله

اللي يعرفو لخبار

فيه واحد املاقيها

وبيّن اعجابه بيها

دوّر على منزلها

وطلب يدّها من هلها

وطبع الحلال

إيجو يطلبوه اجهار

روح المسكين

شايل قناطر همْ

والحزن مالي العين

لا ينزح ولا يتم

وفي خاطره

تطول أيام اقصار

أيام كل ما يتلاقو...تبتسم

ووين خاطره

تقوى عليه النار

ساعه ايلوم فـ قسمه ونصيبه

وساعه ايلوم فـ اظروفه العصيبه

وأتهّيل عليه لفكار

ويخطر عليه كل ماصار

وما أيجيب طاري الخيبه

حاجه غريبه !

كم من كلام

 انقال

وباقي كلام

الفكر مابا ايجيبه

وكم من اشاره

 بينت لحوال

ومن حال

ما تنفع امعاه كتيبه